+ Recursos

Esta obra colectiva reúne unha serie de traballos que pretenden contribuír ao esforzo de recuperación da memoria democrática da Galicia do século XX. Punta Herminia, o Pazo de Meirás, Malpica, a foxa do Acebo, Pontesampaio, o Monte da Madroa, o edificio Ribainsa Uno de Vilagarcía e a Facultade de Económicas da Universidade de Santiago de Compostela, compoñen un rico acervo de espazos físicos e tanxibles do país cos que se busca ampliar o recordo da violencia represiva do franquismo, pero tamén recuperar a moitos esquecidos –e esquecidas– que fixeron camiño na consecución dos dereitos e liberdades dos que hoxe gozamos.

Unha guía docente coa que se facilita o traslado dos resultados dos proxectos de Memorias Vivas a propostas didácticas para as aulas da Educación Secundaria Obrigatoria e do Bacharelato. Seguindo metodoloxías empíricas e motivadoras para o desenvolvemento dos contidos curriculares da historia do século XX, este recurso oriéntase ao fomento de valores cívicos e democráticos e á integración do alumnado nos procesos históricos globais a partir de aspectos propios da súa contorna máis inmediata. Do mesmo xeito, a guía enmárcase nas orientacións fixadas pola actual Lei de Memoria Democrática.